Tag Archives: அறிஞர் அண்ணா

தீபாவளி – அறிஞர் அண்ணாவின் கேள்விகள்?

லால்குடி இந்துவின் தீபாவளி வேறு, லாகூர் இந்துவுக்கு தீபாவளி மற்றோர் காரணத்துடன் ஏற்பட்டிருக்கிறது. லாகூரில் ஒரு ரூபாய்க்குப் பதினாறு அணா, லால்குடியிலும் அதேதான்! இதோ தீபாவளி பற்றி அண்ணா அவர்களின் கட்டுரை.

இங்கே தீபாவளி நரகாசுரவதத்தைக் குறிக்கிறது அல்லவா? பஞ்சாபிலே அப்படிக் கிடையாது. நளச் சக்கரவர்த்தி, சூதாடி அரசு இழந்த இரவுதான் தீபாவளியாம்! இங்கே நாம், அசுரனை ஒழித்த நாளென்று ஸ்நானம் செய்து மகிழ்வது சடங்காகக் கூறப்படுகிறதல்லவா? பஞ்சாபிலே நடப்பது என்ன? சூதாடுவார்களாம், பண்டிகையின்போது! தமிழகத்து இந்து, தீபாவளியை நரகாசுரவதமாகவும், பஞ்சாப் இந்து அதே தீபாவளியை நளமகாராஜனுடைய சூதாட்டத் தினமாகவும் கருதுவது எதைக் காட்டுகிறது? வேடிக்கையல்லவா? லாகூரில் ஒரு ரூபாய்க்குப் பதினாறு அணா, லால்குடியிலும் அதேதான்! ஆனால் லாகூர் இந்து தீபாவளியின் போது, நரகாசுரனை நினைத்துக் கொள்ளவில்லை. லால்குடி இந்துவுக்கு தீபாவளி, நளச் சக்ரவர்த்தி சூதாடிய இரவு என்று தெரியாது. மான்செஸ்டரிலே உள்ள கிறிஸ்துவரை, ஏசுநாதர் எதிலே அறையப்பட்டார் என்று கேளுங்கள், சிலுவையில் என்பார். மானாமதுரையிலே மாயாண்டி, மத்தியாஸ் என்னும் கிறிஸ்துவரான பிறகு அவரைக் கேளுங்கள், அவரும் ஏசு சிலுவையில் அறையப்பட்டார் என்றுதான் சொல்வார்.

இங்கோ லால்குடி இந்துவின் தீபாவளி வேறு, லாகூர் இந்துவுக்கு தீபாவளி மற்றோர் காரணத்துடன் ஏற்பட்டிருக்கிறது. அவ்வளவோடு முடிந்ததா வேடிக்கை! – மேலும் உண்டு. மகாராஷ்டிர தேசத்திலே, தீபாவளிப் பண்டிகை எதைக் குறிக்கிறது என்று கேட்டால், விநோதமாக இருக்கிறது. மகாவிஷ்ணு வாமன அவதாரம் எடுத்து மகாபலியின் முடியிலே அடியை வைத்த நாளாம் அது! லால்குடிக்கு லாகூர் மாறுகிறது. லாகூரிலிருந்து புனா போனால், புதுக் கதை பிறந்துவிடுகிறது. கூர்ஜரத்திலே தீபாவளி புது வருசத்து வர்த்தகத்தைக் குறிக்கிறதாம்! வங்காள தேசத்தில் காளிதேவையை இலட்சுமியாகப் பூஜை செய்யும் நாளாம் தீபாவளி! சிலர், ராமன் மகுடம் சூட்டிக் கொண்ட தினமே தீபாவளி என்று கொண்டாடுகிறார்களாம்! சரித்திர ஆராய்ச்சியைத் துணை கொள்ளும் சில இடங்களிலே, தீபாவளி என்பது தேவ கதைக்கான நாளல்ல; உஜ்ஜைனி நகர அரசன் விக்கிரமாதித்தன் பட்டம் சூடிய நாளைக் கொண்டாடும் பண்டிகையாம்! இவ்வளவோடு முடிந்ததா? இல்லை.

இந்திய தேசத்திலே நான்கு ஜாதிகள், சிரவணம் பிராமணருக்கு, நவராத்திரி க்ஷத்திரியர்களுக்கு, வைசியர்களுக்கு தீபாவளி, இதராளுக்கு (!!) ஹோலிப் பண்டிகை என்று சம்பிரதாயம் ஏற்பட்டிருப்பதாக மற்றோர் சாரார் கூறுகின்றனர்.

இதில் எது உண்மை? அறிவுடையோர் சிந்திப்பீர்!

(அறிஞர் அண்ணா எழுதியது)

தொகுப்பு: பரணீதரன் க

ஜெ.வின் தமிழ்நாட்டுத் துரோகம்!

தமிழர்களின் 150 ஆண்டுக் கனவான சேது சமுத்திரத்திட்டத்திற்குத் தடை விதிக்கவேண்டும் என ஜெ.யின் அரசு மனு போட்டுவிட்டது.

எந்த வளமும் இல்லாத வானம் பார்த்த பூமியான தென் மாவட்ட மக்களின் வாழ்வில், பொருளாதாரத்தை உயர்த்தும் திட்டமாகத்தான் சேதுத் திட்டத்தை அன்றைய தலைவர்கள் முன் மொழிந்தனர்.குறிப்பாக தென் மாவட்டத்தில் பிறந்த பெருந்தலைவர் காமராசர் இத்திட்டத்தில் ஆர்வம் காட்டியுள்ளார்.பேரறிஞர் அண்ணா தி.மு.க.தொடங்கிய காலத்தில் இருந்து வலியுறுத்தியுள்ளார்.

தொழில் வளம் இல்லாததால் தென் மாவட்டங்களில் ஜாதிய உணர்வும் மேலோங்கும் நிலை எந்நாளும் உண்டு.அவர்களுக்கு தொழில் வளத்தையும் பொருளாதார வாய்ப்பையும் ஏற்படுத்தி கொடுத்தால் ஜாதிக் கலவரங்கள் குறையும் என்பது உறுதி.அதனால்தான் சேதுத் திட்டம் வந்தால் அந்தக் கனவு நிறைவேறும் என நினைத்திருந்தோம்.

தி.மு.க.வும்,அ.தி.மு.க.வும் சேதுத் திட்டத்தை ஆதரித்த கட்சிகள்.ஜெ.தனது இரண்டு தேர்தல் அறிக்கைகளில் சேது சமுத்திரத்திட்டதை நிறைவேற்றவேண்டும் என்று கூறிப் பேசிவந்தவர்.வைகோவும் ம.தி.மு.கவின் திட்டங்களில் சேது திட்டத்தை வலியுறுத்தியவர்:அதற்காக நாடாளுமன்றத்தில் பலமுறை முழங்கியவர்.

பா.ஜ.கவின் தேசிய ஜனநாயகக் கூட்டணி ஆட்சிக் காலத்தில் இந்தத் திட்டம் தொடங்க முடிவெடுக்கப்பட்டது.பின்னர் காங்கிரஸ் தலைமையிலான ஐக்கிய முற்போக்குக் கூட்டணியின் ஆட்சியில் அடிக்கல் நாட்டப்பட்டு தொடங்கப்பட்டது.

இந்த நிலைகளில் எல்லாம் சேது சமுத்திரத்தில் இல்லாத ராமன் பாலம் பின்னர் பா.ஜ.க.வின் அரசியலுக்காக திடீரென முளைத்தது.சுப்பிரமணிய சாமி தனது பார்ப்பனத் தனத்தை சுப்ரீம் கோர்ட்டில் காட்டினார்.
அதுவரை அமைதியாக இருந்த ஜெ.வும் தனது பார்ப்பனீய குணத்தை வெளிப்படுத்தினார்.விளைவு தென் மாவட்ட மக்களின் கனவின் மீது இடி விழுந்துவிட்டது.இன்று ஆட்சிப் பொறுப்பில் அமர்ந்தவுடன் ஜெ.தனது தமிழ்நாட்டுத் துரோகத்தை இன்று இழைத்துவிட்டார்.

இது தமிழ்நாட்டுத் துரோகம் மட்டுமல்ல; ராஜபக்சேவுக்கு செய்யும் உதவி.

சேது சமுத்திரத் திட்டத்தால் அதிகம் பாதிப்பது இலங்கை அரசுதான்.தற்போது அவர்களுக்குக் கிடைக்கும் வருவாயில் பெருமளவு அப்படியே தமிழகத்துக்குக் கிடைக்கும் வாய்ப்பு உருவாகும்.
இன்று ஜெ.அரசின் நிலையை அறிந்து உள்ளபடியே ராஜபக்சேதான் அதிகம் மகிழ்ந்திருப்பார்.சேதுத் திட்டத்தை தடுப்பதில் பா.ஜ.க.,ஆர்.எஸ்.எஸ்.,சு.சாமி.,ஜெயலலிதா என அனைத்துப் பார்ப்பனர்களும் ஒன்றுபோல சிந்திக்கிறார்கள்.

7.5 கோடி மக்கள் வாழும் மாநிலத்தின் பொருளாதாரத்தை அழிக்க ஒரு கற்பனைக் கதையைக் காரணம் காட்டமுடிகிறது.அதற்கு இந்த நாட்டு சட்டமும்,நீதிமன்றங்களும் உடன்படுகிறது என்றால்,இந்த நாடு எந்த நூற்றாண்டில் இருக்கிறது? இதனை உலகம் அறிந்தால் சிரிக்காதா?

உலக நாடுகள் பலவற்றில் கடலுக்குள் சாலை போடுகிறார்கள்;எரிவாயுக் குழாய் பதித்து வேறொரு நாட்டுக்குக் கொண்டு செல்கிறார்கள்;ரயில் ஓட்டுகிறார்கள்.கண்காட்சியகம் அமைக்கிறார்கள்;கப்பலின் அகலத்தில் நீர் வழிப்பாலம் அமைத்து கால்வாயில் கப்பல் ஓட்டுகிறார்கள்.இதெல்லாம் அயல் மண்ணில் அயராமல் நடந்துவருகிறது.ஆனால்,இந்த ஆரியமயமாக்கப்பட்ட நாட்டில் ஆபாசக் கதை மாந்தனின் பெயரால் ஒரு மாபெரும் மக்கள் நலத்திட்டத்தையே முடக்கமுடிகிறது என்றால்…இந்தியா முன்னேற இன்னும் எத்தனை நூற்றாண்டு ஆகப்போகிறதோ?

இந்து மத நம்பிக்கைப் படி கடவுளை நிதிக்கும் திட்டங்களைச் செய்யக்கூடாது என்றால்,மண்ணையே தோண்டக்கூடாதே?அது பூமா தேவியல்லவா? கல்லில் இருந்து கட்டைவரை,விலங்கில் இருந்து விண் வரை அத்தனையும் கடவுளாக்கப்பட்ட இந்தியாவில் மக்களின் நல் வாழ்வு என்றைக்குத்தான் சாத்தியம்?

சரி இதெல்லாம் ஒரு புறம் இருக்கட்டும்.ஈழப்பிரச்சினையில் ஜெ.வைத் தூக்கி வைத்துக் கொண்டாடும் வைகோ,தடுமாறன்,சைமன்,தறுதலை சனியன் வகையறாக்கள் என்ன சொல்லப் போகின்றன என்பதை ஆவளோடு எதிர்பார்க்கிறேன்.

அப்புறம், பல்டியே சக்தி என்று கலைஞரைக் காய்ச்சிய ஆனந்த விகடன் பார்ப்பன ஏட்டின் தாசானு தாசர்கள் என்ன எழுதப் போகிறார்கள்?
சேது சமுத்திரம்.ஈழ விவகாரத்தில் ஜெ.அடித்த பல்டிகளை எழுதுவார்களா? ராணுவத்தை அனுப்பி ஈழத்தைப் பெற்றுத் தருவேன் என்ற ஜெ.இன்று ஒரே ஒரு மனுப் போட்டு சிங்கள மண்ணை வாழவைத்திருக்கிறாரே…!விகடனின் எழுதும் வீராதி வீரத்தமிழர்களே உங்கள் பதில் என்ன?

ஈழப் போராட்டம் வென்றுவிடும் என்ற காலகட்டம் இருக்கும் போது அதனை எதிர்ப்பது;அழிப்பது;போராளிகளுக்கு ஆதரவாக இருக்கும் சக்திகளை ஒடுக்குவது.பிரபாகரன் பேட்டிக்கு 600 பத்திரிகையாளர்கள் குவிந்ததைக் கண்டு கொதித்துப் போய் பிரபாகரனைப் பிடித்து வரவேண்டும் என்றும் பேட்டி தருவது;
ஈழப்போராட்டம் முடிவுக்கு வந்துவிட்டது என்று தெரிந்தவுடன் எனக்கு ஓட்டுப் போடுங்கள் ஈழத்தைப் பெற்றுத்தருவேன் என்று மேடையில் நடிப்பது;சட்டமன்றத்தில் சப்பைத் தீர்மானம் போடுவது;இன்னொரு பக்கம் சிங்கள மண்ணை வாழவைக்க சேது சமுத்திரத் திட்டத்தை முடக்குவது;ராஜபக்சேவின் மனதைக் குளிர வைப்பது.

தெரிந்து கொள் தமிழா இதற்குப் பெயர்தான் ஆரியக் கூத்து!

ராஜபக்சேவுக்கு எதிராக கொந்தளிக்கும் கலைஞரின் எதிரிகளே…ராஜபக்சேவை குளிரவைக்கும் ஜெ.யின் இந்த நடவடிக்கையைக் கை கொட்டி வரவேற்கப் போகிறீர்களா?
வெட்கம்…வெட்கம்…

இனம் இனத்தோடு சேர்கிறது என்பதைத் தமிழா நீ எப்போதுதான் புரிந்துகொள்ளப்போகிறாய்?

“யாரை எங்கே வைப்பது என்று யாருக்கும் தெரியலே…
அண்டங் காக்கைக்கும் குயில்களுக்கும் பேதம் தெரியலே…”

– என்ற கண்ணதாசனின் பாடல்தான் நினைவுக்கு வருகிறது.

மதுவிலக்கு: ராஜாஜி கிண்டலும், கலைஞரின் பதிலும்

தேர்தலில் தோல்வியடைந்த ராஜகோபாலாச்சாரியார் கலைஞரை நிந்தித்து கல்கியில் எழுதிய கவிதையும், அதற்கு கலைஞர் கவிதையாலேயே கிழித்தெறிந்த பதிலும்.

ராஜாஜியின் கவிதை

“சாராய சகாப்தம்’

ஆகஸ்ட் பதினைந்தொரு விழாவல்ல
ஆகஸ்ட் முப்பதே தமிழ்நாட்டு விழா
தாழ்ந்தவர் உயர்ந்தார் மதுவிலக்கு வந்ததும்;
வீழ்ந்தவர்கள் முன்போல் வாட
ஆழ்ந்த அறிஞர் அண்ணாவை மறந்து விட்டு
வள்ளுவர் வாக்கைக் காற்றிலே பறக்கவிட்டு
வரம் பெற்றுப் பதவி யடைந்த கருணையார்
கள்ளும் சாரயமும் தந்தார்
அரங்கேற்றினார் கடைகளை ஆயிரக் கணக்கில்
போற்றுக முதல்வர் பணியை!
சோற்றுத் திண்டாட்டம் – ஏழை மனைகளில்
சாராயக் கடைகளில் பெரும் கொண்டாட்டம்!
போற்றுக தமிழ் நாட்டு முதல்வரை!
சாராயக் கடைகளை அரங்கேற்றினார்
வரம்பெற்ற கருணைச் செல்வர்!

-ஆச்சாரியார்

************************************
ஆச்சாரியாருக்கு கலைஞரின் பதில் கவிதை:

கிழ பிராமணா! உன் வாக்குப் பலித்தது

`சாராய சகாப்த மென்று ஓர் கவிதை
சக்ரவர்த்தி ராஜாஜி மாமுனிவர்
தாராளமாய்க் `கல்கி ஏட்டில் தீட்டியதால்
யார் யாரோ சுதந்தராக்கள் மகிழ்கின்றார்.
`பார் பாராய்க் குடித்தவர்கள் பர்மிட் வாங்கி
நேர்மாறாய்ப் பேசுகின்றார் புத்தர்போல!
இதயத்தில் நோய் என்றும்
இரு யூனிட் வேண்டுமென்றும்
இதோ `டாக்டர் சர்டிபிகேட் பாருமென்றும்
இங்கிருக்கும் சுதந்தராக்கள் குடித்த கதைஊர் அறியும்
பணக்காரர் பகல் வேடக்காரரெல்லாம்
மணக்கும்மது வாங்குவதற்கு பர்மிட் வேண்டும்
பகட்டுக்கு ஒருநீதி – பாவம் ஏழைக்கு ஒருநீதி
பஞ்சாங்க சாத்திரத்தின் புதுநீதி
வாடுகின்ற ஏழைக்குடிகாரன்
வார்னீஷைக் குடித்து செத்த போதும்தனம்
மேவுகின்ற சீமான்கள் – போதை
மோதுகின்ற `விஸ்கி, ரம் அடித்தபோதும்
நவ்ரோஜி வீதியில்தான்
நாற்றம் துளைக்கலையோ?
நாடுதான் பார்க்கலையோ?
`ஆழ்ந்த அறிஞர் அண்ணா என்று
அன்பர் ராஜாஜி இன்றெழுதப் பார்த்து நான்
அயர்ந்தேதான் போனேன் அய்யா!
இன்னொருநாள்,
அண்ணாபற்றி அரசாங்கப் பாடநூல் வந்தபோது அற்பவயதில் செத்தவரெல்லாம்
அவதாரப் புருடர் தாமோ என எழுதி
அவர் மகிழ்ந்ததெல்லாம் மறந்தாபோகும்?
ஒரிசாவில் இவர்கட்சி ஆட்சியிலே
ஓடிற்றே மதுவின் வெள்ளம்! அப்போது
தரிசாகப் போனவது ஏன் இவரின் உள்ளம்?
வரம் பெற்ற கருணைச்செல்வா என – எனை
வாழ்த்துகின்றார்! வணங்குகின்றேன்
வரம் தந்தார் இவரல்ல; நேசக்
கரம் தந்த நாட்டு மக்கள்!
வரம் பெற்றேன் – பெரியார் அண்ணா தந்த நெஞ்ச
உரம் பெற்றேன்.
இப்போதும் சொல்கின்றேன்,
கேட்டிடுக!
இந்தியா முழுமைக்கும் அறவே
மதுவிலக்கு கொண்டுவர
சட்டம் செய்தால்:
சிரம் தாழ்த்தி கரம் குவித்து
சிறப்பான செயல் என்று போற்றி நின்று
செயலாக்க முந்திடுவேன்
அதன் பிறகும்;
இதய நோய் என்று – சிலர்
இருட்டினிலே குடிப்பதையும்
இனி அனுமதிப்பதில்லை யென்று விதி செய்வேன்
முழுவிவரம் தேவை யெனில்
பட்டியல் பிறகு சொல்வேன்!

– டாக்டர் கலைஞர்

(17.9.1971 ஈரோடு தந்தை பெரியார் சிலை திறப்பு விழாவின் போது பாடிய கவிதை)

(தகவல்: ’முகநூல்’ அன்சாரி முஹம்மது)

திசைகாட்டும் கருவிகள்

இந்தி எதிர்ப்பு
மாநாடு!
ஈரோடு எங்கும்
கொடிக்காடு!

அகங்காரம்
அறுத்தெரிந்த அண்ணா
அலங்கார வண்டியில்
அமர்ந்திருக்க…

தம்பிக்குப் பின்னால்
தடியூன்றி
தள்ளாடித் தள்ளாடி
தாடிக்கிழவன்
நடந்து வர…

ஊர் மெச்சிய
ஊர்வலம்
உற்சாகமாய்
அரங்கேறிற்று!

வழி நெடுகிலும்
குழுமியிருந்த கூட்டம்…
அய்யாவின்
பனித்துளி நிகர்த்த
பாசம் பார்த்து
கண்ணீர்த்துளிகள்
உதிர்த்தன

கரைபுரண்ட
களிப்போடு!
எனக்கு வயது
எழுபதைத் தாண்டிற்று!

என் முதுமை
என் முதுகில் தட்டி…
பெட்டிச் சாவியைப்
பிள்ளையிடம்
கொடு என்று
வேண்டிற்று!

மாநாட்டு மேடைதனில்
களங்கமற்ற
அய்யா பேச்சு – அவரை
வணங்கிடச் சொன்னது
வந்திருந்தோரை!

அண்ணன் தம்பி உறவு
அறுபட்டுப் போயிற்று!
தந்தை தனயனாயினர்
தம்பியும் அண்ணனும்!

கூடுதலாய் கூடுதல்
குற்றமோ என்னவோ?
பிரிவு என்னும்
பேராயுதம்
பரிவு காட்ட மறுத்தது!

உரசல்களில்லா
உறவுகள் ஏது?
ஒரு கூட்டுப் பறவைகள்
இருவேறு திசைகளில்
மனமின்றி பறந்தன!

பேராசான் பிறந்தநாளில்
பிறந்தது
பேரறிஞரின்
தி.மு.க. எனும்
திராவிடக் குழந்தை!

இரட்டைக் குழல்
துப்பாக்கிகளாகின
இருவர் இயக்கமும்!

அறிவாசனின்
அடுக்குமொழி முழக்கம்
துடிப்பான களப்பணி
வெற்றிக் கனியாகி
விழுந்தது அவர் மடியில்!

ஆட்சி கிடைத்ததும்
ஆசானை மறந்துவிட
மனிதர்களால் முடியும்
மகான்களால் முடியுமா?

அன்னை கரங்களில்
பிள்ளை விழுவதுபோல்
அய்யா கரங்களைப்
பற்றி – அண்ணா
வணங்கிய காட்சி…
கோடிக் கண்களுக்கு
குதூகலம் தந்தன!

தமிழனின்
தனித்துவத்தை
தரணியில் உயர்த்திய
தந்தை சொன்னார்…
என் அந்தஸ்தை
கூட்டிட்டார் – என்
இளவல்
அண்ணா என்று!

கோட்டையில் – திராவிடக்
கொடி உயர்த்திய -அண்ணா
எட்டுத் திசைகளிலும்
கொட்டி முழங்கினார்!
நான் கண்டதும்
கொண்டதும்
அய்யா ஒருவரே என்று!

திராவிட இனத்தின்
திசைகாட்டும் கருவிகள்
அய்யா அண்ணா
புகழுக்கு அழிவேது?
இந்த இருவருக்கும் நிகர் ஏது?

கவிஞர். மணிவேந்தன்.
மாநில இளைஞர் அணித் துணைச் செயலாளர்
மதிமுக.
நன்றி :- சங்கொலி