Monthly Archives: November 2015

இளித்தது பித்தளை!

திராவிடர் கழகத் தலைவர் ஆசிரியர் கி.வீரமணி அவர்களின் நேர்காணலில் கையாண்ட ஊடக தர்ம மீறல்.
இராமகோபாலன், எச்.ராஜா இத்யாதிகளிடம் காட்டிய இனப்பாசம்.

இந்துத்துவ மதவெறிசக்திகளுக்கு துணைபோகும் தொடர் போக்கு.

பார்ப்பவர்களை முகம் சுழிக்க வைத்த இது போன்ற நிகழ்வுகளால் பாண்டேவின் முகத்திரை கிழிந்து “ஆயுத எழுத்து” நெறியாளருக்கே ஒரு சுயபரிசோதணை செய்து வைக்க வேண்டிய நிலைமை தந்தி நிர்வாகத்திற்கு ஏற்பட, பாண்டேவை சுபவீ கேள்வி கேட்கும் நிகழ்ச்சி ஒளிபரப்பப்பட்டது.

சுபவீ யின் கேள்விகளுக்கு தன்பக்கம் நியாயம் இருப்பதைப்போல் போக்கு காட்டினாலும் பெரும்பாலும் மழுப்பலாகவே இருந்தது பாண்டேவின் பதில்கள்.

பளபளக்கும் என நினைத்தவர்களுக்கு ஏமாற்றமே மிஞ்சியது. எத்தனை பாலிஷ் போட்டாலும் பித்தளை இளிக்கத்தானே செய்யும்.

இந்த நிகழச்சியைப் பார்த்த பொழுது, தந்தை பெரியார் அவர்கள் சொல்லும் ஒரு கதைதான் நினைவிற்கு வருகிறது.

விருந்திற்கு வந்த மாப்பிள்ளையின் வாய் நாற்றத்தை சகிக்க முடியாத மாமியார், மருமகனிடம் “இந்த ஊர் கரும்பு பேர்போனது. தின்று பார்த்து வீட்டிற்கும் வாங்கி வாருங்கள்” என்று சொல்லி காசு கொடுத்து அனுப்பி வைத்தாள். வீடுதிரும்பிய மாப்பிள்ளை கொடுத்தனுப்பிய காசுக்கு எல்லுப்புண்ணாக்கு வாங்கி தானும் தின்று விட்டு வீட்டுக்கும் வாங்கிவந்தானாம்!

# இந்தக் கதையோடு நேற்று சுபவீ யின் கேள்விகளுக்கு பாண்டே பதிலளித்த விதத்தையும் சேர்த்து கொஞ்சம் நினைவில் அசைபோட்டுப் பாருங்கள் தோழர்களே!

-கி.தளபதிராஜ்

 

வாங்க தீபாவளி கொண்டாடுவோம்!


பூமியை பாயாச் சுருட்டிகினு கடலுக்குள்ளார போயிட்டான் பாழாப்போன அசுர பய ஒருத்தன். பாப்பானெல்லாம் பெட்டிஷன் போட, விஷ்ணு அடுத்த செகன்ட் பன்றி கெட்டப்புல கடல்ல பாஞ்சி அவனை கைமா பண்ணிட்டு பூமியை இஸ்துகினு வந்து பழையபடி விரிச்சுட்டார்.

விரிச்சதுதான் தாமதம், பூமிக்கு விஷ்ணு மேல லவ்வுன்னா லவ்வு, அப்படி ஒரு லவ்வு பத்திகிச்சு. சும்மா இருப்பாரா விஷ்ணு ? கசமுசா ஆக பூமாதேவி நரகாசுரன்கிற பிள்ளைய பெத்துப்புட்டா. பார்ப்பானர்கள் கிட்டயே நரகாசுரனும் வம்புக்குப் போக அவனுங்க மறுபடியும் பெட்டிஷன் போட்டுட்டானுங்க.

நரகாசுரனை வீழ்த்த எவ்வளவோ ட்ரை பண்ணியும் விஷ்ணு வால முடியலை. பெத்த புள்ளையையே கொல்ல விஷ்ணுவால முடியலைங்கிற செய்தி விஷ்ணுமேல அவன் பொண்டாட்டிக்கு சந்தேகத்தை உண்டாக்கிருக்கும் போல. அவளே நேரடியா கலத்துல இறங்கி சக்காளத்தி (பூமாதேவி) புள்ளைய கொன்னுட்டா.

அவன் செத்த நாளை சந்தோஷமா எண்ணெய் வச்சு தேச்சு குளிச்சிகினு சோக்கா டிரஸ் பண்ணிக்கினு நாஸ்தா பண்ணனும்பா. இதான் தீபாவளி!

# பூமி உருண்டையாச்சே? அதை எப்படி பாயா சுருட்ட முடியும்? கடலும் பூமிக்குள்ள தானே இருக்கு! பூமியை எங்க நின்னுகிட்டு சுருட்டுனான்? அசுரன்னா திராவிடன் னு சொல்றாங்களே ?நம்மாளு செத்த நாளை நாமே கொண்டாடுறதா? இப்படியெல்லாம் யோசிச்சீங்கன்னா நீங்க காலத்துக்கும் தீபாவளியே கொண்டாட முடியாது. பேசாம “மூளை”யை கழட்டி ஒரு மூலையில வச்சிட்டு நாலு வெடியை பத்தவச்சமா, கறிசோறு திண்ணமான்னு விழாவை கொண்டாட பாருங்க. “கறிசோறு”ன்னு சொன்னதை தப்பா புரிஞ்சுகிட்டு மாட்டை கீட்டை அடிச்சுடாதீங்க. நாளும் கிழமையுமா பாசக்கார பயலுவோ, “எங்க மாதாவ ஏன்டா அடிச்சே?”ன்னு வரிஞ்சுகட்டிக்கிட்டு வந்துடப்போறானுங்க!.

– கி.தளபதிராஜ்

தமிழ்த்தேசிய வியாபாரிகளே, பிசினஸை மாற்றுங்கள்!

நீதிக்கட்சி, சுயமரியாதை இயக்கம், திராவிட இயக்கம் இது போன்ற வரிகளைக் கேட்டாலே தமிழ் வியாபாரிகளுக்கு வயிற்றில் புளி கரைப்பது ஏனோ தெரியவில்லை. வருகிற நவ 20 நீதிக்கட்சி நூற்றாண்டு துவக்கநாளை முன்னிட்டு சென்னையிலே திராவிடர் கழகத்தால் நீதிக்கட்சி நூற்றாண்டு விழா அறிவிப்பு வெளியானது தான் தாமதம் பேணாவை தூக்கி விட்டது தமிழர் கண்ணோட்டம்.
நீதிக்கட்சிக்கும் திராவிடர் கழகத்திற்கும் என்ன சம்பந்தம்? நாயரும்,தியாகராயரும் தோற்றுவித்த நீதிக்கட்சியை கேரளாவில், ஆந்திராவில் கொண்டாடாமல் தமிழ்நாட்டில் கொண்டாடுவதன் உள்நோக்கம் என்ன? நீதிக்கட்சியினர் திராவிடர் என்ற சொல்லையே ஏற்றுக் கொள்ளவில்லை. பெரியார் இட ஒதுக்கீட்டிற்கு என்ன சாதித்து கிழித்துவிட்டார்? இப்படி பொய்யும் புனையுமாக புரண்டோடுகிறது கட்டுரை.
நீதிக்கட்சியை தூக்கி நிறுத்த, பெரியார் சிறைபட்டிருந்த காலத்தில் சர்.ஏ.டி.பன்னீர் செல்வம் தனது தோளுக்கிட்ட மாலையை பெரியாரின் காலுக்கிடுகிறேன் என்று சொல்லி, மேடையில் இருந்த பெரியார்படத்திற்கு இட்டு அவரை நீதிக்கட்சியின் தலைவராக்கிய வரலாறையெல்லாம் அறியாதவர்களா தமிழக மக்கள்?

பார்ப்பனரல்லாதாரின் நலனுக்காக 1916 நவம்பர் 20ம் நாள் தென்னிந்திய நல உரிமை சங்கம் திராவிடர் இயக்கத் தலைவர்களால் இதே சென்னை மாநகரில் விடோரியா பப்ளிக் ஹாலில் தானே துவக்கப்பட்டது. சென்னையில் துவக்கப்பட்ட ஒரு இயக்கத்திற்கு ஆந்திராவில் ஏன் கொண்டாடவில்லை? ஆப்பிரிக்காவில் ஏன் கொண்டாட வில்லை? எனக் குதர்க்க கேள்விகள் ஏன்?
பின்னாளில் நீதிக்கட்சி என்று அறியப்பட்ட தென்னிந்திய நல உரிமை சங்கத்தின் பிதா மகன்களில் ஒருவரான டாக்டர் நடேசனார் அவர்களாலே துவக்கப்பட்டதுதான் “மெட்ராஸ் யுனைட்டட் லீக்” அமைப்பு. 1912ல் துவக்கப்பட்ட அந்த அமைப்பின் முதலாமாண்டு விழா சென்னையில் டாக்டர் நடேசனாரின் மருத்துவமனை தோட்டத்திலே நடைபெற்றது. மெட்ராஸ் யுனைட்டட் லீக் எனும் பெயரை “திராவிடர் சங்கம்” எனும் பெயர்மாற்ற தீர்மானம் ஏகோபித்த ஆதரவில் அன்று இயற்றப்பட்டதுதானே வரலாறு. ஒருவகையில் நீதிக்கட்சிக்கும் இந்த திராவிடர் சங்கம் தான் முன்னோடி.
1916ல் துவங்கப்பட்ட தென்னிந்திய நல உரிமை சங்கத்திற்காக “ஜஸ்டிஸ்” எனும் ஆங்கிலப்பத்திரிக்கை துவங்கப்பட அப்பத்திரிக்கையின் பெயரே பிரதானமாகி “ஜஸ்டிஸ் பார்ட்டி” என ஆங்கிலத்திலும், “நீதிக்கட்சி” என தமிழிலுமாக அந்த அமைப்பையே அழைக்கத்துவங்கினர். அதே ஆண்டில் நீதிக்கட்சியினரால் தமிழில் வெளியிடப்பட்ட பத்திரிக்கை “திராவிடன்” என்பதை இவர்கள் அறிவார்களா?
தமிழகத்தில் அன்றைக்கு சென்னையிலும், திருச்சியிலும் மட்டுமே முதல்தரக் கல்லூரிகள் இருந்தன. அங்கே பார்ப்பனர்களால் நடத்தப்பட்ட விடுதிகளில் பார்ப்பனரல்லாத மாணவர்கள் அமர்ந்து சாப்பிடுவதற்கான அனுமதி மறுக்கப்பட்ட நிலையில் அவர்கள் மிகுந்த அவதிக்குள்ளாயினர். இதை உணர்ந்த டாக்டர் சி.நடேசனாரால் 1916ம் ஆண்டில் சென்னை திருவல்லிகேணியில் பார்ப்பனரல்லாத மாணவர்களுக்காக துவக்கக்கப்பட்ட விடுதிக்குப் பெயர் “திராவிடர் சங்க விடுதி”.
திராவிடர் இயக்கத்திற்கும் நீதிக்கட்சிக்கும் என்ன தொடர்பு என்பதை நீங்கள் அறியாமல் இருக்கலாம். இது பாட்டனுக்கும்-தந்தைக்குமான உறவு! தந்தைக்கும்-மகனுக்குமான உறவு! என்பதை தமிழர்கள் நன்றாகவே உணர்ந்திருக்கிறார்கள். பெரியாரை விமர்சிப்பதே ஒரு பிழைப்பாய், விளம்பரமாய் இன்னும் எத்தனை காலத்தை வீணடிக்கப் போகிறீர்கள்? தொடர்ந்து அம்பலப்பட்டு முகத்திரை தாறுமாறாக கிழிந்து தொங்குகிறது. பிசினஸை மாற்றுங்கள்!

-கி.தளபதிராஜ்